කෝච්චියේ ජෝඩු දමා ආවෙමි! - There is always a first time

ඊයේ හරි ජොලි දවසක්.

මොකද මගේ ජීවිතයේ පළමුවෙනි වරට කෝච්චියක දී ගෑණු පරාණයක් එක්ක ජෝඩු දාලා ආවා!

නිකං නොවෙයි, ලඟින් වාඩිවෙලා, හොඳින් හේත්තු වෙලා, නිකං බැඳපු ජෝඩුවක් වගේ.

මං වැඩට යන්නේ එන්නේ කෝච්චියේ බව කලින් කීප වතාවක්ම ලිව්වා මතකයි.

මං රස්සාවට කෝච්චියේ යන එන ගමන පටන් ගත්තු මුල් කාලේ කෙරුවේ ඒ වෙලාවේ පොත් බලපු එකයි. බාගයක් දුර පොත් බලනවා. අනිත් බාගේ දොයිය බබා කරනවා.

පස්සේ පටන් ගත්තා ලැපට කතන්දර කොටන්න.

ගිය අවුරුද්දේ දවසක මං පාවිච්චි කරපු හුරුබුහුටි ලැප කැඩුණා. දැන් පාවිච්චි කරන කිලෝ හතරේ දරහැව අතේ ගෙනියන්න බැරි නිසා, මේ දවස්වල කතන්දර මුලින් ලියන්නේ පොත්වලයි. එහෙම නැත්තං ගෙදර ඇවිත් ඒ මං දරහැව ය කියපු ලැපට කොටනවා.

කෝච්චියේ යනකොට පොත් කියෙව්වත්, පොත්වල ලිව්වත් ගමණින් බාගයක්ම නින්ද යන එක යනවාමයි.

ඒත් ඊයේ (සැප්තැම්බර් 3) හවස ගෙදර එන ගමණේදී නම් පොඩි වෙනසක් වුණා.

ඒක තමයි ජෝඩු දාලා, හේත්තු වෙලා කෝච්චියේ ගෙදර එන්න ලැබීම.

ඉස්සර අයිතිකාරයින් ගේ ඉස්කෝලෙට යන අවුරුදු දාසයේ කොල්ලා කාලේ මං කෝච්චියේ යද්දී එද්දී තමයි කවි ලියන්න උත්තේජනය ලැබුවේ. ඒත් කවි පොත් ගණනාවක් ම ලියවුණා මිස කවදාවත් කෝච්චියේ ජෝඩු දාලා යන්න එන්න නම් ලැබුණේ නෑ.

පසු කාලෙක ජෝඩු දාලා යන්න චාන්ස් ලැබුණත් ඒ බස්වල යන්න විතරයි.

ඒකයි අද දවස සහ මේ ලබපු අත්දැකීම මට පුද්ගලිකව ඉතා වැදගත්.

කතන්දරහාමිනේ ඊයේ උදේම ගෙදරින් ගියා මටත් කලින්. එයැයිට ඊයේ දවස පුරාම ඉන්ටර්වීව් ගණනාවක්ම කරන්න තිබුණා. ඒ මේසේ මේ පැත්තේ ඉන්න නොවෙයි, අනිත් පැත්තේ ඉන්ටර්වීව් පැනල් එකේ ඉන්නයි. මේ කියන ඉන්ටර්වීව් තිබුණේ අපේ ඔෆීසියට ටිකක් ලඟ තැනකයි.

වෙනදාට දවල් වරුවේ එකපාරක්වත් කතා කරනවා වුණත් අද වැඩ රාජකාරි නිසා අපි දෙන්නාට මල් කඩන්නත් අමතක වුණා!

වැඩ ඇරිලා ගෙදර එන්න ස්ටේෂමට ආපුවාම තමයි මතක් වුණේ හාමිනේව. කතා කරලා බැලින්නම් මං නගින්න ඉන්න කෝච්චියටම එයැයිත් නැගලා මට කලින් ස්ටේෂන් එකෙන්.

ඉතිං ඔන්න කෝච්චිය ස්ටේෂන් එකේ නවත්තපු ගමං ම වගේ මං ඇතුලට ගියා.

මෙන්න ඉන්නවා කතන්දරහාමිනේ!

මාව දැකපු හාමිනේ ගේ කට කණේ.

මට පුදුම ජොලියක් දැණුනා. ඒ කවදාකවත් අපි දෙන්නා තනියම කෝච්චියක එක ලඟින් වාඩිවෙලා ගිහින් නැති නිසා.

මගෙත් කට කණේ.

ඉතිං අපි දෙන්නා පොඩි පහේ සතුටු සාමීචියක යෙදෙමින් කෝච්චියේ ගෙදර එන්න පටන් ගත්තා.

නමුත් ඉතිං වෙනදා වගේම ඒ ගමණෙන් බාගයක් විතරයි.

අනිත් වෙලාවේ මං හොඳට හාමිනේට හේත්තු වෙලා වෙනද වගේ ම හොඳට නිදාගත්තා!

-කතන්දරකාරයා

ප/ලි:
මේ මගේ ඊයේ දවස ගතවුණු ආකාරයෙන් කෙටසක් රැගත් වෙබ් ලොග් = බ්ලොග් (Web Log = Blog) එන්ට්‍රියයි.

කලින් දවසක මා ලියූ "හාෆ් ඩේ එකක් දැම්මෙමි!" බ්ලොග් එන්ට්‍රිය මෙතනින් කියවන්න.
http://kathandara.blogspot.com/2013/03/half-day-casual-leave.html


(image: http://www.bolsoverphotos.com/tag/train/)