ඡන්දෙට කැන්වසින් ආපු පාසල් මිතුරා (පොඩි ඉලෙක්ෂන් කතන්දරයක්) - Nalanda Piyathilake meets his match!

මේ සිද්ධිය වෙන කොට මට අවූරුදු විස්සක් විතර ඇති. මේ කියන කාලේ ආණ්ඩුව කියන මල්ටි-බිලියන් රුපියල් බිස්නස් එක රන් කෙරුවේ යූඇම්පී එකෙන්. සිරි-ලංකා කාරයෝ අර දාහත් වසරක සාපයට ද මොකක්දෝ එකට අහුවෙලා නන්නත්තාර් වෙලයි හිටියේ.

ඔන්න ඔය අතරේ මොකක්දෝ ඉලෙක්ෂන් එකක් තිබ්බා.

මේ දවස්වල යුනිවසිටියේ නිවාඩු කාලේ හින්දා මං ගෙදරයි හිටියේ.

අපි හිටියේ තාත්තා ගේ මහ ගෙදර. ඒ පරණ ගෙවල්වල තියෙනවා ඉස්තෝප්පු කාමරයක්. ඒක තමයි මටයි, මල්ලිටයි අයිතිවෙලා තිබුණේ.

එදා රාත්‍රියේ අපේ මිදුලේ කවුද කතා කරනවා ඇහුණා. මේ කියන කාලේ මැසි මදුරුවෝත් අද වාගේ නැති හින්දා අපේ ගෙදර රෑට දොරවල් වහන්නේ නෑ, නිදා ගන්න යනකම්ම.

මං කාමරෙන් එළියට ආවා. තාත්තාත් ගේ ඇතුලේ ඉඳලා එළියට ආවා.

බැලින්නම් මේ ඇවිත් ඉන්නේ අපේ අල්ලපු ගෙදර නාලන්ද පියතිලකයි, තවත් කොල්ලො දෙන්නෙකුයි.

නාලන්ද පියතිලක කියන්නේ මගේ පන්තියේ සිටි මිතුරෙක්. පොර ඒ ලෙවල් කරලා මේ කියන කාලේ ඉංගිරිසි ටියුෂන් පන්තියකට යමින් ජොබ් එකක් හොයමිනුයි හිටියේ.

"අපි ආවේ මේ ඉලෙක්ෂන් එක ගැන කියන්නයි!" නාලන්ද කිව්වා.

බැලින්නම් නාලන්දයා යූඇම්පී එකට වැඩ කරනවා. මේ ඇවිල්ලා ඉන්නේ ඉලෙක්ෂන් එකට යුඇම්පීයෙන් ගහපු විස්තර පත්‍රිකා, මඩ පත්තර, මනාප දෙන හැටි වගේ දේවල් බෙදන්නයි.

අවුරුදු විස්ස කියන්නේ ඇඟේ ලේ හොඳටම රත්වෙන කාලයක් නේ. මට ඒ කාලේ යූඇම්පීකාරයෝ පෙන්නන්න බෑ. අද වගේ අනේ පව් අසරණයෝ කියලා හිතෙන්නේ නෑ, මොකද යූඇම්පීය තමයි මං මුලින් කියපු විදියට ලංකාණ්ඩුව කියන මල්ටි-බිලියන් රුපියල් බිස්නස් එක රන් කෙරුවේ.

දැන් මට නාලන්දයාට බණින්නත් ඕනෑ, ඒත් බණින්නත් බෑ. මොකද මූ මගේ පාසල් මිතුරා, අසල්වැසියා සහ ඒ මදිවට අපේ ඥාතියෙක්.

ඔන්න නාලන්දයා යූඇම්පී ප්‍රචාරක පත්‍රිකා ගොන්නක් අරගෙන එකට මිටියක් හදලා මගේ අතට දුන්නා.

මං කෙරුවේ ඒවා ගන්න වගේ අත දික්කරලා, අරගන්නේ නැතුව බිමට වැටෙන්න ඇරියා.

නාලන්දයා ගේ කට ඇදවෙලා ගියා.

අපේ තාත්තා ගේ මූණ රත් වෙච්ච තාච්චියක් වගේ වුණා.

මට කුරිරු සතුටක් ඇතිවුණා!

නාලන්දයි, අනිත් කොල්ලෝ දෙන්නයි ඒ කොල ටික අහුලලා තාත්තාට දීලා යන්න ගියා.

ඊට පස්සේ තමයි, තාත්තා මට මගේ ජීවිතයේ අන්තිම පාරට බැන්නේ. නිකං නෙමෙයි පලු යන්න බැන්නා.

ඒත් මගේ හිතේ ඇතිවුණු කුරිරු සතුට නම් වැඩි වුණා මිස අඩු වුණේ නෑ!

පස්සේ නාලන්දයාට ගුරු පත්වීමක් ලැබුණා.

නමුත් ඒ යූඇම්පීයට කඩේ ගිය හින්දාම කියලා මං කියන්නේ නෑ.

පොර පාසල් යන කාලේ දක්‍ෂ ශිෂ්‍යයෙක්. උසස් පෙළ කළායින් පස්සේ උනන්දුවෙන් ඉංගිරිසි ඉගෙන ගෙන ටෙක් එකේ ඉංගිරිසි ඩිප්ලෝමා එකක් හෙම කරමිනුයි ඒ දවස්වල හිටියේ.

දැන් නාලන්ද පියතිලක දක්‍ෂ ඉංගිරිසි ගුරුවරයෙක්.

-කතන්දරකාරයා

ප/ලි:
මං දැන් ටික කාළෙකට ඉස්සර දවසක අපේ පරණ ගම් පැත්තේ අම්මයි තාත්තයි එක්ක ගිය වෙලේ නාලන්දලා ගේ ගෙදරටත් ගොඩ වුණා. එදා සෙනසුරාදා පොර ටියුෂන් කඩේ කරන්න ගිහින් නිසා හමුවෙන්න නම් බැරිවුණා.

නාලන්ද පියතිලක රඟපාන වෙනත් කතන්දර (ප්‍රධාන චරිතම නොවේ, සුලු චරිත සහ නම සඳහන් කිරීම් ද ඇතුලත්ය).

1. පන්සල් යන්න සරොං අඳින්න ඕනැද?

2. තුනේ පන්තියට පාස් වුනෙමි

3. ගෑල්ළමයෙකුගේ අවාසනාව නිසා හතරේ පන්තියට කලර්ස් පෙන්නා පාස් වුණෙමි

4. කූනිස්සෙකු ගේ මතකය

5. හික් හික් හික් කුරුක් කුරුක්

6. මුල්වරට පන්ති නායකයා වුණු කතන්දරේ

7. කතන්දරකුමාර හතරෙන් පහට පාස්වෙයි

8. පුංචි පහේ පන්ති නායකයා

9. මෙන්න තවත් ඡන්ද ප්‍රතිපලයක් - පන්ති නායිකාවරණය

10. ඔන්න සිංහල තලිබාන් ලා ඇවිත්! - හෙට සිට හැම පිරිමියා ම උඩු රැවුල වැවිය යුතුය!

11. අනේ කතන්දර ඔයා කළු වෙලා! - Sri Lankan Bruce Wills


(image: http://www.euronews.com/tag/sri-lanka/)