කටුනායක එයාපෝට් එකේ සිදුවීමක් - What's wrong with Sinhala?

ඔය එයාපෝට් එකට අපි සමහරු ලේසියට කටුනායක එයාපෝට් එක කිව්වට ලංකාවේ ආණ්ඩුවේ ඔෆීෂියල් නම තමයි බණ්ඩාරණායක ජාත්‍යන්තර ගුවන්තොටුපොල කියන එක!

නමුත් ලංකාවෙන් පිට ගියාම බණ්ඩාරණායක, කටුනායක, අරණායක, මේනායක කියන ඔය නායක කෑලිවල තේරුමක් නැතුව යන නිසා, ඕක හැඳින්වෙන්නේ කළම්බු එයාපෝට් කියන සරල නමෙන්.

අද මං මේ කියන්න යන්නේ කටුනායක එයාපෝට් එකේ දී මං අත්විඳපු සරල සිදුවීමක් ගැන කතන්දරයක්.

මං මුලින්ම කටුණායක ගියේ අපේ තාත්තා උගන්නපු ඉස්කෝලේ වැඩකරපු සාදු කෙනෙක් සියම් රටේ වන්දනාවක ගිය දවසෙයි. සාදුව ඇරලවන්න ගුරු මණ්ඩලයේ කට්ටියක් වෑන් එකක් හයර් කරගෙන එයාපෝට් ගිය නිසා, මටත් තාත්තා එක්ක ගිහින් ප්ලේන් නග්ගනවා බලන්න චාන්ස් එකක් ලැබුණා.

ඒ ගමන ගියේ හවස් වරුවේ. මට මතකයි, අපි අර නැරඹුම් ශාලවේ ඉඳලා සාදු ගේ ප්ලේන් එක යනවා බලන් හිටිය හැටි.

ඊලඟට මං එයාපෝට් ගියේ අපේ අංකල් කෙනෙක් අප්‍රිකාවේ රටක ජොබ් එකක් කරන්න සිය පවුල පිටින් ගුවන්ගත වුණු දවසේයි. එදා නම් අපි කටුනායක යන්න රත්මලාණෙන් පිටත් වුණේ රෑට බත් කාලා. ගෙදර ආවේ දෙගොඩ හරි ජාමේ.

එයාපෝට් එක කිව්වාම දවසේ පැය විසිහතරම විවෘතව තියෙන තැනක් වුණාට, මං කටුනායකට ගිය දවස්වලින් සෑහෙන දවසක් එතනට ගිහින් තියෙන්නේ මහ රෑ. මොන හේතුවක් හින්දා ද මන්දා, මං රටෙන් පිට ගිය, ආපසු ආපු ප්ලේන් සේරම වගේ කටුනායකකින් ගියේ ආවේ මධ්‍යම රාත්‍රියේ දී ම තමයි.

ඔන්න මේ කියන දවසේත් මං එයාපෝට් එකට යන්න ගෙදරින් පිටත් වුණේම දහයට විතර. මං සිංගප්පූරුවට යන ප්ලේන් එක පිටත් වෙන්න තිබුණේ උදේ එකකුත් ගාණට වගේ තමයි මට මතක.

චෙකින් කරලා, බෑග් එකෙන් නිදහස් වෙලා ඔන්න මං ඊළඟට ගියා ආගමන විගමන කවුන්ටර් දිහාවට. මෙතනදී තමයි අපි නැව් නැගීමේ පත්‍රය පුරවන්නේ!

ඔතන නැව කියන්නේ මූදේ යන නැවක්ය කියන එකම නොවෙයි, ගුවන් නැව කියන අදහසත් එක්ක පොදුවේයි.

මං හිතන්නේ කාලෙකට කලින් හැටේ දශකයේ දී විතර අන්තිමට යාවත්කාලීන කරපු ෆෝර්ම් එකක් තමයි මේ කියන දවස්වල (ඒ කියන්නේ 2005 දී විතර) තිබුණේ.

දැන් නං මං හිතන්නේ මේ කියන ෆෝර්ම් එක වෙනස් කරලාද කොහෙද!

කොහොම හරි මේ කියන නැව් නැගීමේ පත්‍රයේ, ඉංගිරිසියෙන් කියනවා නම්, එම්බාකේෂන් කාඩ් එකේ සිංහල, දෙමල සහ ඉංගිරිසි භාෂා තුනෙන්ම විස්තර තියෙනවා. අපිට කැමති භාෂාවකින් පුරවන්න පුළුවනි.

මං සාමාන්‍යයෙන් මේ ෆෝර්මය පුරවන්නේ සිංහලෙන්. ඒක එහෙම කරන්න පුළුවන් ලංකාවේදී විතරයිනේ.

ඔන්න මං එදා මේ නැව් නැගීමේ පත්‍රය පුරවමින් ඉන්න වෙලාවේ මා ළඟට ආවා කාන්තාවක්.

"මට මේ ෆෝම් එක පුරෝලා දෙන්න පුළුවනිද?" එයා ටිකක් ආයාචනාත්මකව මගෙන් ඇහැව්වා.

මට මතකයි කලින් දවසක මං ආපහු ගෙදර එන ගමණක කටුනායක දී ඔය විදියට කස්ටම් එකේ ෆෝම් එක පුරවලා දෙන්නයි කියලා ඩුබායි පැත්තේ ඉඳලා ලෑන්ඩ් කරලා හිටිය ගෑල්ළමයෙක් කරපු ඉල්ලීමක් ඉෂ්ඨ කරන්න ගිහින් ඒ බාරගත්ත ජොබ් එකක් ඉවර වුණේ කෙල්ලෝ තුන් දෙනෙකුගේ ම ෆෝම් පුරෝලායි.

මේ ලලනාවත් සයිප්‍රස්වල වැඩකරන් යන කෙනෙක්. අපේ රට දුවන්නේ මේ අයගේ ශ්‍රමයෙන්. ඉතිං අපේ යුතුකම මේ කට්ටියට උදව් කරන එකනේ.

අර විදේශ රැකියා කාර්යාංශයද මොකක්ද ඔෆීස් එකක් තිබුණට එතන සර්ලා ටිකක් මිසක් විදෙස් රැකියාවකට රට යන කෙනෙක් ඉන්නවා නං මං කවදාකවත් දැකලා නෑ!

ඉතිං, මං මේ කාන්තාවට කිව්වා "මගේ ෆෝම් එක පුරෝලා ඉවර වුණු ගමන්ම එයාට උදව්කරන්නම්!" කියලා.

ඔන්න මං ෆෝම් එක පුරෝනවා. මේ කාන්තාව එතනට වෙලා ඉන්නවා.

මං නිකමට කිව්වා "මේ ෆෝම් එකේ මහ ලොකු අමාරු දේවල් අහන්නේ නෑ නේ. ඔයා මුළ හරිය පුරවන්න, මං උදව් කරන්නම්" කියලා.

"අනේ ඉතිං මට මේ ඉංගිරිසි බෑ නේ!"

"ඉංගිරිසි මොකටද? මේක සිංහලෙන් පුරවන්න පුළුවනිනේ. මේ මං ලියන්නෙත් සිංහලෙන්!" මං මගේ ෆෝම් එක මේ මනුස්සයාට පෙන්නුවා.

මෙන්න බොලේ ඒක දැක්කා විතරයි මෙයා වහාම මං හිටපු තැනින් යන්න ගියා!

මං හිතන්නේ ෆෝම් එක ඉංගිරිසියෙන්ම පුරවා ගන්න වෙන කෙනෙක් හොයා ගෙන යන්න ඇති.

ඒත් මට තාමත් හිතාගන්න බැරි මට කියලා සිංහලෙන් ඒක ලියා ගත්ත නම් මේ ගෑණිට මොකක්ද වෙන අඩුපාඩුව කියලයි!

-කතන්දරකාරයා

ප/ලි:
කටුණායකින් ගොඩ බහින කොට පුරවන්න තියෙන ෆෝම් එකේ අහනවා අපේ රැකියාව මොකක්ද කියලා. මං ඒකට බය සැක නැතුව, හරිම ආඩම්බරෙන් ලියන්නේ බ්ලොගර් කියලයි!


(image: http://srilankaholidayactivities.com/destinations/katunayake-sri-lanka/)