Wednesday 15 February 2012

මේව්ව උඹට හොඳ පාඩම් නොහොත් බෝංචි ග්‍රීන් කරිය - How not to cook Beans


අපේ එක්තරා ඇන්ටි කෙනෙකු ගේ සහ එම අංකල් ගේ එක් වීරයෙකු වූයේ ඉස්කෝලේ යන කාලේ ඉඳලාම මේ දෙන්නාම හොඳින් දන්න අඳුණන පොරක් වුණු සන්තියාගෝ අයියා යි.

මේ සන්තියාගෝ අයියා ඉස්කෝලේ යන කාලේ ජවන හා පිටිය මලල ක්‍රීඩා ශූරයෙක්ව ඉඳලා තියෙනවා. මා දන්නා කාලෙදීත් පොර බඩ රස්සාවට කළේ එක්කෝ අධ්‍යාපන අමාත්‍යංශයේ හෝ නැත්තම් ක්‍රීඩා අමාත්‍යාංශයේ වගේ තැනක ශාරීරික පුහුණු උපදේශකවරයෙක් විදියට වැඩ කරන එකයි.

සන්තියාගෝ අයියා ගේ ප්‍රිය බිරිඳ සන්තියාගෝ අක්කාත් ඒ වගේම ක්‍රීඩා ක්‍ෂේත්‍රයේ ම කෙනෙක් ද කොහෙද?

ඊටත් වඩා වැදගත් කාරණය වුනේ මේ යුවලගේ දරුවන් දෙන්නා ජාතික මට්ටමින් විවිධ ක්‍රීඩා ඉසවු වලට සහභාගී වුණු ශූරයෝ දෙන්නෙක් වුණු එකයි.

ඔන්න දවසක් අපේ ඇන්ටියි අංකලුයි ගිහින් සන්තියාගෝ ලා ගේ ගෙදර. ගිහින් දවල්ට කාලා හවස් වෙලා තමයි ඇවිත් තියෙන්නේ.

එදා ගමන ගැන පස්සේ වුනු කතාවකින් මං එක් වැදගත් දෙයක් ඉගෙන ගත්තා. ඒක බෝංචි උයන එක ගැන ලොකු වැදගත් රහසක්.

සන්තියාගෝ ලා ගේ ගෙදර තිබුණු බෝංචි කරියේ බෝංචි කෑලි බාගෙට අමුවට තමයි තිබිලා තියෙන්නේ. කිරි, මිරිස්, ලුනු රහ හෙම නිකං ලාවට ලාවට වගේ වදින්න.

එළවළුවල මුළු ගුණම ඇඟට ගන්න නම්, ඒවා තැම්බෙන්නම උයන්නේ නැතුව නිකං ලාවට අමුවට හැපෙන ගානට උයන්න ඕනෑයි කියලයි ශරීරවර්ධනය ගැන හෙම හොඳට ගැන දන්න කියන සන්තියාගෝ ලා අපේ ඇන්ටි ට කියලා දීලා තිබුණේ.

බෝංචිවලට විතරක් නෙමේ, කැරට්, බීට්, පලාවර්ග වගේ බොහොමයක් එළවලුවලට මේ කතාව අදාලයි!

අර "වඩේ බදිනකොට අඩුවෙන් බදින්න!" කියනවා වාගේ එළෝළු උයන කොට බාගෙට ඉදෙන්න තමයි උයන්න ඕනෑ.

ඇන්ටිගෙන් මේ කතාව ඇහැව්වයි කියලා අපේ අම්මා නං එයා ගේ පාරම්පරික උයන ක්‍රමය වෙනස් කළේ නෑ. නමුත් මේ කතාව මගේ හිතේ ඇතුලේ තැන්පත්වෙලා තිබුණා මේ වෙන කොට ලියා පල කරපු පන්සීය පනහක් කතන්දර සහ තවත් පන්සීයක් විතර ලියන්න තියෙන කතන්දරත් එක්ක.

දවසෙන් දවස, සතියෙන් සතිය, මාසෙන් මාසේ, වසරෙන් වසර කාලේ ගෙවිලා ගිහින් මංතුමා ඒ-ලෙවල් කරලා, පේරාදෙනියේ රස්තියාදු වෙලා, බොසී ලා යටතේ මැවිසුරුකම් කරලා, තායිලන්තයේ මහන වෙලා ඉඳලා, කසාද බැඳලා යනාදී සියළුම කරණං ගහලාත් තව අවුරුදු කීපයක් ගතවුණාට පස්සේ ඔන්න මට නොමිලේම වගේ ලැබුණා උයන පිහන කටයුතු ගැන පොඩි උනන්දුවක් ඇති කරගන්න චාන්ස් එකක්.

මං මුලින් උයන්න ඉගෙන ගත්තේ බත්, පරිප්පු වගේ සරල දේවල්.

පස්සෙන් පහු මං ටික ටික එක්ස්පරිමන්ට් කර කර පුරුදු වුණා අනිත් එළවලු වර්ගත්, මස් වගේ දේවලුත් උයන්න.

බෝන්චි උයන එක රෙසිපියක් මං කලින් දැම්මානේ, ඒක නං හැබැයි හාමිනේ ගේ එකක්.

මේ වගේ තවත් මං ඉගෙන ගත්තු බෝංචි හදන ක්‍රමයක් තමයි තායිලන්තේ තියෙන ග්‍රීන් කරි එක. මේ කරිය හදන එකේ තියෙන ජොලිම වැඩේ තමයි කඩෙන් පැකට් එකක් අරගෙන කෙලින්ම හොද්ද ඒදන්න පුළුවන් හරියට අර ඇන්ටි ටින් එකක් දානවා වගේ.

දෙතුන් දවසක් උයලා, හාමිනේ එක්ක ටේස්ට් කරලා වැඩේ හොඳට පුරුදු පුහුණු වුණාට පස්සේ, මං මේ තායි ග්‍රීන් කරි පැකට් එකක් දවසක් අරං ගියා අපේ අම්මයි තාත්තයි බලන්න ගිය දවසක එහේ.

එදා මගේ ප්ලෑන් එක වුනේ අම්මටයි තාත්තටයි මගේ අතින්ම උයලා කන්න දෙන්න. (අන්න බලන්න අපේ කාලේ හැදුණු රත්තරං කෑලි වගේ පුතා ලා ගේ හොඳ වැඩ!)

ඔන්න ඉතිං, බත් ඉව්වා, පරිප්පු උයලා තෙම්පරාදු කළා. කුකුල් මස් කරි එකකුත් හැදුවා. ඒ එක්කම මේ කියපු තායි ග්‍රීන් කරියත් හැදුවා බෝන්චිවලින්.

දැන් ඔන්න මේසේ සූදානම්. දෙකෙලවර දේශනාවට මඩුව මත්වුණා!

අපේ ගෙදර පොර ළමයා තාත්තා නේ. පොර තමයි ඉස්සෙල්ලාම කන්නේ. තාත්තා ආවා, බෙදා ගත්තා බත් පොඩ්ඩකුයි, හොදි මාලුපිණියි, පොඩ්ඩ පොඩ්ඩ අනලා කන්න පටන් ගත්තා.

"මේ බෝංචි මාලුව හරියට ඉදිලා නෑ, අමුයි!" එක බෝංචි කෑල්ලක් හපපු තාත්තා කීවේ එච්චරයි.

බෙදාගත්තු බෝංචි ටික එහෙමම පිඟානේ පැත්තකට ඉතුරු කරළා අනිත් දේවල් එක්ක බෙදා ගත්තු බත් වලින් ටිකක් කාපු තාත්තා පිඟන් කොටේ එතන තියලා කුස්සියේ සින්ක් එකෙන් අත හෝදාගෙන යන්න ගියා.

තාත්තා කාලා ඉතුරු කරපු පිඟානේ කරපිංචා කොළ ටිකකුයි බත් කටවල් දෙක තුනකුයි එක්ක මගේ තායි ග්‍රීන් කරි බෝන්චි ටික දිලිසි දිලිසී තිබුණා.

අම්මා සුපුරුදු පරිදි කළේ තාත්තා ගේ බත් කොටේ ඉතුරු වෙලා තිබුණු දේවල්වලට තව බත් හැන්දකුත් දාලා, මස් හොඳි ටිකකුත් දාලා, කලවම් කරලා ගෙදර ඉන්න බූලා ගේ පිඟානට දාලා පිලිකන්නෙන් තියපු එකයි.

මං නං එදා තායි ග්‍රීන් කරි එක එක්ක රහ කර කර බත් කෑවා.

හවස් වරුවේ ගෙදර පිටිපස්සට පැත්තට ඇස් යොමු වෙච්ච වෙලාවේ තමයි දැක්කේ අපේ බූලා බල්ලා කරලා තිබුණු අළුගුත්තේරු වැඩේ!

ඌ පිඟානේ තිබුණු අම්මා කලවම් කරලා දාපු බත් ඇටයක් ඉතුරු නොකර, කරපිංචා කොලත් එක්කම කාලා තිබුණා.

පිඟානේ දිලිසි දිලිසී ඉතුරු වෙලා තිබුණේ, මගේ තායි ග්‍රීන් කරි එකේ බාගෙට තැම්බුණු බෝන්චි කෑලි ටික විතරයි.

-කතන්දරකාරයා

ප/ලි:
තායි ග්‍රීන් කරි රෙසිපිය පසු දිනක සිතුවම් සහිතව පල කෙරෙනු ඇත.

ප/ප/ලි:
බෝංචි ඇට ගැන මං ලියපු කතන්දරය මතකද?
http://kathandara.blogspot.com.au/2010/09/blog-post_24.html

44 comments:

  1. හපොයි. ඔය වගේ වට්ටෝරු දේශීයකරණය කරන්න ඕනි ගොඩක් වෙලාවට.

    ReplyDelete
    Replies
    1. මෙතන ප්‍රශ්ණේ තායි රෙසිපිය නෙමේ.

      අම්මාගේ හොඳින්උයපු බෝංචි හොද්ද කා ඇති තාත්තාට මගේ බාගෙට ඉඳුණු කරිය රස නැති වීමයි.

      Delete
  2. බල්ලොත් නොකන තායි ග්‍රීන් කරි... :D

    ReplyDelete
    Replies
    1. මං මුලින් මේ කතන්දරේට දැම්ම ටයිටලේ, බල්ලොත් නොකන බෝංචි කියලායි. එක්තරා හේතුවක් නිසා පස්සේ වෙනස් කළා.

      දැන් මේක කමෙන්ට් එකක් විදියට ආ නිසා තියෙන්න අරින්නම්!

      Delete
    2. මට තේරුනා මොකද එහෙම නොදැම්මෙ කියලා..ඒ හේතුවමද දන්නෙ නෑ ඉතින්.. :)

      අවුලක් නම් අයින් කරන්න..

      Delete
  3. මම මේ බැලුවේ ඇන්ටි ටින් එකක් දාපු කතාවට ලින්ක් එක නැත්තේ ඇයි කියලා...:DDD
    රෙසිපිය දාන්නකෝ දවසක අපිටත් හදන්න. :D

    ReplyDelete
    Replies
    1. තැන්කියු, ඔන්න දැම්මා!

      Delete
    2. මං දැම්මා කිව්වේ ඇන්ටි ටින් එකක් දාපු එකේ ලින්ක් එක. රෙසිපිය පස්සේ දවසක දාඤ්ඤං!

      Delete
  4. "ඇන්ටි ටින් එකක් දානවා වගේ." කියන තැන ලින්ක් එක දාන්න මිස් වෙලා.

    - අ.ජ.ම.රා. (සිංගප්පුරුවේ සිට)

    ReplyDelete
    Replies
    1. @ අ.ජ.ම.රා. (අපේ ජනාධිපති මහින්ද රාජපක්‍ෂ!)

      ඔන්න මචෝ ලින්කුව දැම්මා!

      Delete
    2. මහා රජාටද මචෝ කිව්වෙ ?

      Delete
    3. මචෝ..!! හික් හික්... :D

      Delete
  5. ඕක කෑවනං බල්ලට මෙනව වෙයිද?

    ReplyDelete
    Replies
    1. අපේ බල්ලාත් නිකං සන්තියාගෝ ලා ගේ බල්ලා වගේ ආරලා එන්න ඉඩ තිබුණා.

      Delete
    2. බල්ලා හොල්මන් වුනාද දන්නෑ මොකද්ද බොලේ මේ අමුතු කරි එක කියලා..

      Delete
  6. අමුවෙන් කන්න පුලුවනෑ නේද?? තාත්තා හරි... :D

    ReplyDelete
  7. භාගෙට තැම්බුවාම රස අඩු උනත් ගුණයි නේ (මාස ගණනක සිට බ්ලොග් එකට ආවා රසවින්දා මෙී පළමු කොමෙන්ට් එක) නීල්

    ReplyDelete
  8. මමත් නං කතන්දර, බෝංචි, අල, පරිප්පු වගේ ඒවා කන්න කැමති ඔය ක්‍රමේට. එත‍කොට ඒවයෙ නියම රස දැනෙනවා. ඒත් ගෙවල්වල තියෙන ලිප හැසිරවීමේ පුර්ණ බලය මට නැති නිසා මම නං කරන්නෙ උයන වෙලාවට ගෙදර හිටියොත් ඒවා මගේ ගානට ඉදෙද්දි ලිප ඕෆ් කරන එක...... කෑම කන වෙලාවට පොඩි කච බචයක් තිබ්බත් කෑම ටික රසට කෑවැකී.....!


    බාගෙට තම්බලා කන එක ගුණදායකයි වගේම උයන්න කලින් අඩුම ගානේ එලෝලු පැය බාගයක්වත් වතුරෙ දාලා තියලා ගන්ඩ කියලත් කියනවා. හේතුව ඒවට ගහන රසායනික ද්‍රව්‍ය ටිකක් හරි දියවෙලා අයින් වෙන්න.

    ReplyDelete
    Replies
    1. ඇත්තම කිව්වොත් බුද්ධි අපේ ගෙදර එළවලුත් ඔයවගේ බාගෙට තමයි උයන්නෙ. මම මන් කැමති ෆුල් තැම්බෙනකන් උයනවට. නමුත් උඹ කැමති අනිත් විදියටනෙ!! හරි ගුනේ ගැන හිතමුකො එහෙනම්. අර පැය බාගයක් වතුරේ දාලා තියන අක කරලා බලන්න ඕනෙ, මොකද ඒක හොඳ අදහසක් වගෙ.
      henryblogwalker the Dude

      Delete
  9. මම කැම්පස් ආපු මුල් දවස්වල නෑදෑ ගෙදරක නැවතිලා හිටියා. එහෙ උයන්නෙත් ඔය වගේ තමයි.

    ReplyDelete
  10. ජරස් බරස් ගාලා හැපෙනෙකොට මටත් නිකං මෙවුවා මෙවුවා වාගේ ඒක නිසා මමත් කැමති සද්දයක් බද්දයක් නැතුව කන්න . පපඩම් කනකොට වුණත් ඒවා සද්දෙට හැපෙනවාට මම කැමති නෑ ඒක නිසා ටිකක් පරන කරලා කන එක මගේ පුරුද්දක් :)

    අපේ ගෙදර ඉන්න බලුරාලත් බෝංචි කන්ඩ නම් පොඩ්ඩක්වත් මනාප නෑ හැබැයි

    ReplyDelete
  11. මමත් “බල්ලොත් නොකන” කතාව කොමෙන්ට් එකට දාන්න හිතුව විතරයි. උඩින් දාලනෙ.

    පූසො බොංචි කනවද කියල පූසා කොමෙන්ට් කරයි නේද?

    **** ඔය බාගෙට තම්බලා එළවළු කන්න ඕනැ කතාව හරියන්නෙ පිරිසිදුවට හදාපු කෘමිනාශක වල්නාශක රහිත එළවළු වලට විතරයි.
    විශේෂඥ පොරවල් කියන්නෙ වැඩිපුර හෝදපුවහමත් විටමින් එහෙම හේදිලා යනව කියලනෙ. වඳුර වගේ කෑවනං මිනිස්සුන්ට හැදෙන නානාප්පරාකාර ලෙඩ රෝග ‍එහෙමත් අඩු වෙලා යයි.

    ReplyDelete
  12. හරිම නෝටි බල්ලෙක් නේද?

    ReplyDelete
  13. බල්ලටත් බෝංචි ටික නොකා ඉතුරු කරන්න හිතුනේ ඇයි කියන එකනම් බරපතල ප්‍රශ්නයක්..... :)

    ReplyDelete
  14. මාත් නන් කැමති පොඩ්ඩක් අමුවෙන් කන්ඩ තමයි.

    පොඩ්ඩක්වත් උයන්නෙම නැතුව කන කට්ටියක් ගැන මෙන්න මේ වීඩියෝවත් බලන්ඩකො

    http://www.youtube.com/watch?v=aTecK6odDoc

    ReplyDelete
  15. කතාන්දර බෝංචි උයන්න දන්නේ නෑ කියල කවුරු හරි කියනවනම් මම උංගෙන් අහන්නේ බූලගෙ පිගානේ දිලිසි දිලිසි තියෙන්නේ බෝංචි නැතනම් උංගේ ####....ද(ඔබාගේ චොප්පෙ කිව්වෙ)

    ReplyDelete
  16. ඔය බෝංචි වගේ එලවලු වල පාට ලස්සන වෙනස් නොවී උයාගන්න හෝටල් වල දානවනේද මොනවද ජාතියක්?

    ReplyDelete
    Replies
    1. පාට දානවා. ඩයි...
      ශරීරයට හරිම අහිතකරයි....
      කලරින්...

      Delete
    2. කතන්දරනං පාට දාන්නෙ රැවුලට විතරද කොහෙද

      Delete
  17. අයියා ඕකට දේශීය ඌරුවක් දෙන්න පොඩ්ඩක් ට්‍රයි කරලා තායී ග්‍රීන් වෙනුවට තායි ශ්‍රී ලංකන් ග්‍රීන් ව‍ගේ එකක් හැදුවනම් කට්ටිය කන්න තිබ්බා කියලා මට නම් හිතෙන්නේ....

    ReplyDelete
    Replies
    1. බාගෙට තැම්බු දේශීය ඌරු මස් :P

      Delete
  18. මදැයි එක දාගන්න ගිහින් වෙච්ච් මරාලේ... අම්මටයි තාත්තාටයි කළින් පොඩි ඉන්ට්‍රඩක්ෂන් එකක් දීලා හිටියානම් වැඩේ ගොඩ. බූලාට නම් කොරන්න දෙයක් නෑ...

    ReplyDelete
  19. දෙකෙලවර දේශනාවට මඩුව මත්වුණා???? අයියෝ මේකේ විසඳුම මතක නැතෝ... කියන්න බැරිදෝ...?

    ReplyDelete
    Replies
    1. දෙකෙලවර = කත්
      දේශනාව = බණ
      මඩුව = සාලාව
      මත්වුණා = වෙරිවුනා

      කත් බණ සාලාව වෙරිවුනා
      බත් කන වේලාව සරිවුනා

      Delete
  20. හෙහ්.. කරන්ටෙකත් ගනං ගියා, හෙට අනිද්ද ගෑසුත් යයි උව. එතකොටනං බාගෙට තම්බක එහෙමත් නැත්නං අමුවෙන්ම තමයි කොටාබාන්න වෙන්නෙ.

    ReplyDelete
  21. බූලා නම් cosmopolitan බල්ලෙක් පාටයි. ජාත්‍යන්තර කෑමට පුරුදු කාරයෙක්!

    ReplyDelete
  22. වසිලිස්සා15 February 2012 at 22:09

    අනේ අහිංසක බූලා ! :P
    අපේ තාත්තත් බාගෙට තම්බල ලොකුවට කෑලි කපල එළවලු කන්න කැමති.මටනම් ඒ ක්‍රමේ අමාරුයි :)

    ReplyDelete
  23. කකාට මම පොඩි උපදෙසක් දෙන්නද ????

    මීටපස්සෙ වඩේ බදිද්දි . . .අඩු‍වෙං බදින්නම ඕනෙ නං . . . ඉස්සෙල්ලම දැල්ල පොඩිකරගෙන ඉන්න

    ReplyDelete
  24. හිහ්..

    බෝංචි ලස්සන ට රසට උයන්න පුලුවන් අපෙ අත්තම්මාටයි. හොඳ පොල් කිරි මිටක් දාලා කොළ පාටට උයල. බල්ලත් නොකන බෝංචි මාත් කන්න ප්‍රිය කෑමක් නම් නෙමෙයි...

    මෙන්න මයෙ ලිස්ට් එක..පුළූවන් නම් උයන්න.
    ගැට පොළොස් ඇඹුල
    කෙසෙල් මුව විත් කොස් ඇටස්
    තුඹ ( ගනාන් )
    ලබු ඇඹුල
    කිරි කොස්
    කොහිල අල (සමහරුන්ට හොඳායි )
    කොහිල දළු මැල්ලුම ( අමුවෙන් හොඳායි )

    මොනා තිබ්බත් පරිප්පුත් ඕනිමයි....

    ReplyDelete
  25. නියම ශ්‍රී ලන්කන් බල්ලෙක්, ගෙදර සුවාමියාව හරියටම රිප්‍රෙසෙන්ට් කරනවා. හරියට ලංකාවේ ප්‍රාදේශීය දෙස් පල්ලො වගේ!

    ReplyDelete
  26. බල්ලා නම් අනේ මන්දා :ඩි

    ReplyDelete
  27. මෙම පෝස්ටයේ බත් සහ පරිප්පු සරල කෑම ලෙස හඳුන්වා දීම ගැන මාගේ බලවත් විරෝදය!!!

    ReplyDelete
  28. තායි ග්‍රීන් නැති වුනත් , කහ කුඩු, 3 -5 කුඩු , අමු මිරිස් , කරපිංචා , ලුණු දාලා ඔය වගේම කොළ පාටට බෝංචි උයන්න පුළුවනි කතන්දර !!!
    තායි ග්‍රීන් හොයා ගන්න බැරි අය එහෙම උයල බලන්නකෝ ...ආ...පොල් කිරි චුඋට්ටකුත් දාන ඕනේ....

    මල් පියලි

    ReplyDelete
  29. ඔබ හැම සටහනකම ලින්ක් දාන එකත් හොඳයි. මා බලන බ්ලොග් දෙක තුනෙත් කොමෙන්ටු දාන්නේ නැත්තේ, දාන අනෙක් කොමෙන්ටු නිසා. මා කිසි කෙනෙකුගෙන් අහලා හෝ බලලා උයන්න ඉගෙන නොගත් නිසා, ගොඩක් වෙලාවට මා උයන්නේ "මගේ" විදිහට. සමහරවිට මගේ සහකාරිය අහනවා කොහොමද අරක ඉව්වේ කියා. මට එහෙම කියන්න වට්ටෝරුවක් නැහැ. දාන දේවල් වලට වඩා උයන පිළිවෙල ගැන තමා මා වැඩිපුර බලන්නේ. දයිවයේ සරදමකට ඔබ මෙහි දාල තියන තේරවිල්ල, මාත් මගේ සටහනක ලියුවා. මා පොඩි කාලේ පත්තර වල ගිය තේරවිලි කපලා පොතක අලවන් හිටියා. අද තේරවිලි තියා, නගුලයි, ගඟුලයි අතර වෙනස වත් දන්නේ නැහැනේ!

    ReplyDelete

මා ලියූ කතන්දරයට අදාල නැති කරුණු ඔබේ ප්‍රතිචාරවල ඇතළත් නොකරන මෙන් ඉතා කරුණාවෙන් ඉල්ලා සිටිමි.

අදහස් වාරණයක් නොකෙරේ. කුණුහරුප සහ තුන්වන පාර්ශවයන්ට නින්දා කෙරෙන ප්‍රතිචාර ඉවත් කෙරෙනු ඇත.