මට දෙන්න හැකි දේවල් මෙන්න :: Wishlist Vs What you can offer

තමන් ගේ අත ගන්න එන කොල්ලෙකුගෙන් තමන් බලාපොරොත්තු වෙන දේවල් ගැන පොඩි කුමාරිහාමි දැරිවිය ලිපියක් දාලා තිබුණා.

ඒක දැකපු මාතලන් ගොයියත් ලයිස්තු ගත කරලා තිබුණා ගෑල්ළමයින්ට මොනවාද ඕනෑ කියලා පොරට හිතෙන දේවල්.

තමන් බලාපොරොත්තුවෙන දේවල් ගැන ලයිස්තු හදන එක හරිම ජොලි වැඩේ. මේවාට ඉංගිරිසියෙන් කියන්නේ විෂ්-ලිස්ට් කියලායි.

අපි අනුන්ගෙන් බලාපොරොත්තුවෙන දේවල් ගැන විෂ්-ලිස්ට් හැදීමට වඩා මං හිතන්නේ වැදගත් අපිට අනුන්ට දෙන්න, අනුන් වෙනුවෙන් කරන්න පුළුවන් මොනවාද කියලා ලයිස්තුගත කරන එක.

අර හිටපු ඇමරිකන් එක්සත් ජනපද ජනාධිපති කෙනඩිත් කියලා තියෙනවා නේ Ask not what your partner can do for you - ask what you can do for your partner වගේ තේරුමක් ගෙන දෙන කතාවක්.

මං මේ හදන්නේ මට මගේ සහකාරියට දෙන්න පුළුවන් දේවල් ගැන ලයිස්තුවක් හදන්නයි.

• උදේම ඇඳ ලඟට තේ කෝප්පයක් ගෙනිහින් දෙන්න පුළුවන්
  
• ඕන්නං පාං කෑල්ලක මාජරින් සහ ජෑම් ගාලා දෙන්නත් පුළුවන්
  
• ඉඳල හිටල දවසක කොට්ස් බ්ලවුස් එකක් ඔන්නං මැදල දෙන්න පුළුවන්
  
• දවල්ට කන්න ගෙනියන්න පාං පෙති දෙකක් මැද්දට එලෝළු, මාළු හදපු ඒවා තියෙන විදියට දාලා දෙන්න පුළුවන්
  
• ඉඳලා හිටලා දවසක කන්න මස්, බෝංචි, පරිප්පු වගේ දේවල් සරල විදියට උයලා දෙන්න පුළුවන්
  
• කවියක් ලියලා, ඒක සින්දුවක් විදියට ගායනා කරන්න උත්සාහ කරන්න පුළුවන්
  
• හදිසියේ මං මළොත් හෙම මාව මතක්වෙන්න කියලා අර ගෝස්ට් ෆිල්ම් එකේ වගේ මෙව්ව එකක් තෑග්ගකට අරං දෙන්න පුළුවන්
  
• ඉගෙනීමේ කටයුතුවලට අවවාදාත්මක උදව් දෙන්න පුළුවන්
  
• බැංකුවලින් ණය ගැනීම ගැන පාඩම් කියලා දෙන්න පුළුවන්
  
• ණයට දීමේ ආදිනව ගැන කියලා දෙන්න පුළුවන්
  
• ඔන්නං මේ ලයිස්තුව තව චුට්ටක් විතර දික්කරන්න පුළුවන්
  

හැබැයි ඉතිං හැම එකකම සීමාවකුත් තියෙනවා!

දැන් මං මේ විස්තර ලියන්නේ ඇයිද කියලා ආයෙත් කියනවා නං, අපි අනුන්ගෙන් බලාපොරොත්තුවෙන දේවල් ගැන ලයිස්තු හදනවාට වඩා අපිට අපේ සහකාරයාට හෝ සහකාරියට දෙන්න පුළුවන් දේවල් ගැන කියන එක වැදගත් බව පෙන්නන්නයි.

දැන් මෙන්න අද කතන්දරේ. මං කාලෙකට කලින් අහලා තියෙන එකක්.

ඔන්න එකමත් එක රටක හිටියාලු රාජකුමාරියෙක්. මෙයා විවාහ වෙන්න හොයලා තියෙන්නේ අංග සම්පූර්ණ කුමාරයෙක්වයි.

ඉතිං, ස්වයංවරයේදී විවිධ ප්‍රාන්තවලින් ආපු රාජකුමාරවරු තමන්ගේ වැඩ කිඩ, ශිල්ප හරඹ, අඩුම කුඩුම සහ පංචායුධ පෙන්නුවට මේ කුමාරි නෙමේ ඒ එකෙකුටවත් කැමති වෙලා තියෙන්නේ.

හැමෝගෙම මොකක්දො අඩුවක් ලු !

ඔහොම ඔහොම කාලයක් ගියාම කුමාරිට හම්බ වුණාලු තමං පොඩි කාලේ ඉඳලාම ප්‍රාර්ථනා කරගෙන හිටියාකාරයේ සර්ව සම්පූර්ණ කුමාරයෙක්. ආරෝහ පරිනාහ සික්ස්-පැක් දේහයෙන්, පුළුල් උරතලයෙන්, ඡවි වර්ණයෙන් පරිපූර්ණ පැකේජ් එකක්!

නමුත් ඒ මගුලත් හරි ගිහින් නෑ!

ඇයි දන්නවාද?

මේ කියන කුමාරයා හොයමින් ඉඳලා තියෙන්නේ පරිපූර්ණ කුමාරිකාවක්!

-කතන්දරකාරයා

ප/ලි:
ආයේ මෙන්න මේ ආකාරයේ සින්දු හෙම ඕනෑ නං කියන්න.

(image: http://www.blogger.com/img/blank.gif)