කියන්න කවුද ඔබ කියා - What I did on Sunday

පෙරේදයි, ඊයේයි අදයි නිවාඩු පාඩුවේ වත්තේ පිටියේ පොඩි පොඩි වැඩ දෙකතුනක් කර කර හිටියා. ඒ හින්දා සුපුරුදු පරිදි කතන්දරයක් වෙලාවට දා ගන්නත් ඉඩක් ලැබුනේ නෑ අද.

ඊයේ වැඩපල අතර පොඩි විවේකයක් ගන්න වෙලේ අපූරු යුටියුබ් වීඩියෝ එකක් බලන්න ලැබුණා.

මතකයි නේද දැන් මාසෙකට විතර ඉස්සෙල්ලා ලංකාවේ මියුසික් වීඩියෝ ත්‍යාග ප්‍රදානෝත්සවය තිබුණා. අර සෝමා මාමා පරක්කු වෙලා ඇවිල්ලා පොඩි සයිස් එකක් දැම්මේ? අන්න ඒක.

ඉස්සර අපි පොඩි කාලේ සින්දු ඇහැව්වේ රේඩියෝ එකේ යන ඒවා. ඒ කියන්නේ එතන වැඩ කරපු අංකල් ලා ට, ඇන්ටි ලා ට ඕනෑ ඒවා. හැබැයි ඔහෙලා ගේ ඉල්ලීම් තීරයකුත් තිබුණා. ඒවායෙන් සින්දු ඉල්ලන ගාමා ගාමිණී සුබසිංහ වගේ අයත් හිටියා.

මොන සින්දුව ඇහැව්වත් සද්දේ විතරයි නේ. ඉතිං ඇස් වහගෙන තමයි සින්දුවේ කතන්දරේ හිතෙන් මවා ගන්න වෙන්නේ. කැසට්වලින් අහන කොටත් ඒ සීන් එකම තමයි.

පස්සේ ටෙලිවිෂන් එකේ සින්දු පෙන්නන්න පටන් ගත්තට පස්සේත් මුලින් තිබුනේ ගායකයා සහ වාදක මණ්ඩලය වේදිකාවක සින්දු කියන එක ඈන්ගල්ස් දෙකකින් ක්ලෝස් අප් එක්ක විඩියෝ කරලා, එඩිට් කරලා පෙන්නන එක විතරයි.

ඒත් ඉතිං රේඩියෝ සින්දු අහපු අපට ඒවා "නන්දන වින්දන" වුණා.

ඔන්න තවත් ටික කාලයක් යන කොට සින්දුවලට වෙනම වීඩියෝ හැදෙන්න ගත්තා.

ඒවායේ සාමාන්‍යයෙන් වුනේ සින්දුව කියන මැදිවියේ කපල් එකට අමතරව වෙනම තරුණ කපල් එකක් ලව් සීන් හෝ ලව් සික් සීන් කරනවා අතරින් පතර පෙන්නන එකයි.

දැන් නම් ගායකයෝ විතරක් ඉන්න සින්දු පේන්නෙම නෑ නේද?

මං සති අන්තයේ රස වින්ද මේ වීඩියෝ ක්ලිප් එකේ නම් ඉන්නේ ගායිකාව විතරයි. වෙන නළුවෝ, නිලියෝ නෑ.

ඒ වුනත්, මොන හේතුවක් හින්දද මන්දා මේක මාර විදියට හිතට වැදුණා. කොටින්ම සිත අවුරුදු ගණනාවක් ආපස්සට ගියා වගෙයි දැණුනේ.

ශානිකා සෝමතිලක ආධුනික ගායිකාව කියන "මේ ගඟ මේ දුරු කතර ගෙවා" කියන සින්දුව කලින් දැකලා නැති අය මෙන්න මෙතනින් බලන්න.



http://youtu.be/SevxJr5k76k

දැකලා තියෙන අයත් අනිවාර්යෙන්ම ආපහු එක පාරක් දෙපාරක් බලන්න අකමැති වෙන එකක් නෑ මට හිතෙන විදියට.

-කතන්දරකාරයා