රතුපාට, නිල්පාට, කොලපාට පත්තර - What is your colour?

අද මං ලියන්න යන මේ කතන්දරේ මතක් වෙන්න ආසන්නම හේතුව තමයි දිණමිණ පත්තරේ වැඩකරන සමකය වටේ බ්ලොගයේ අයිතිකාර නලින් දිල්රුක්‍ෂ මගේ කතන්දර බ්ලොගයේ ලඟදී දාපු කමෙන්ටුවකට තුන්වන පාර්ශවයකින් ලබිලා තිබුණු ප්‍රතිචාරයක්.

"වරායෙ ගුදම ගිණි ගත්ත හැටි හොයපංකො, හාමුදුරුවො ගිණි ගත්ත ගමන් කොළඹ ගේන්න නුවර හෙලිකොප්ටරයක් රෙඩි වෙලා තිබුනෙ කොහොම කියලා හොයපංකො, කොල්ලුපිටියෙ මස් කඩ කඩපු සිදුවීමෙ පැමිණිලි පොලිසිය භාරගත්තෙ නැත්තෙ ඇයි කියලා හොයපංකො, මරා රාවය ගන්නෙ කෝටි කීයකටද කියලා හොයපංකො....හොයලා අර දීනමිණේ ලියහංකො...."

ඒ නිර්ණාමික ප්‍රතිචාරයෙන් නලින් ට කියන්නේ ලංකාවේ මේ දවස්වල ප්‍රවෘත්ති මවන කාරණා කීපයක් ගැන දිණමිණ පත්තරේට ලියන්න කියලයි.

මට හිතෙන හැටියට නං ඒ ඒ පත්තරවල ලියවෙන ප්‍රධාන ලිපි මොනවා ගැනද, ඒවායේ අන්තර්ගතය වාත්තු කරන්නේ කොයි ආකාරයටද කියන එක තීරණය වෙන්නේ ඒ ඒ පත්තරවල වැඩ කරන අයගේ අවශ්‍යතාවය හෝ උවමනාව මත නොවෙයි. ඒවා තීරණය වෙන්නේ ඒ ඒ පත්තරවල අයිතිකාරයින් ගේ අවශ්‍යතා සහ උවමනාවන් මතයි.

මං හිතන්නේ හැට ගණංවල ඉඳලා හැමදාමත් ආණ්ඩුවට අයිති ලේක්හවුස් පත්තරවල ආණ්ඩුවට උවමනා ලිපි ලියවෙන්නේ ඒ නිසයි.

ලේක්හවුස් පත්තර ගැන අපේ අදහස එහෙම වුණාට, සාමාන්‍යයෙන් දිවයින, ලක්බිම වගේ පත්තර ගැන මගේ ලොකු අවුලක් තිබුණේ නෑ මීට අවුරුදු තුන හතරකට කලින් දවසක් වෙනතුරු.

ඒකට හේතුව ඒ පත්තර දශක කීපයක් තිස්සේම කියවපු ඒවා වීම සහ අඩු වශයෙන් මුල් කාලයේ දී හෝ උන්ගේ ලයින් එක අපේ ලයින් එක සමග පැරලල් ගමන් කිරීම විය යුතුයි.

මං දිනපතාම වාගේ බැලුවේත් ඔය පත්තර දෙක තමයි අන්තර්ජාලයෙන් ලංකා-ඊ-නිවුස්, ලංකා නිවුස් වෙබ් දෙක කියොලා ඉවර වුනාට පස්සේ.

විශේෂයෙන්ම ඉරිදා ලක්බිමේ යන මංජුසාව අතිරේකය හෙම නොවරදවාම බැලුවා. ඉඳලා හිටලා මං අපේ කාලේ විස්ස විජ්ජාල ගැන ලියපු ලියුං කෑල්ලක් පල වුණෙත් ලක්බිමේ මන්දාකිනියේ හෝ හරස්පාර හෝ සප්ලිමන්ට් එකක තමයි.

ඔය අතරේ මට ඉල්ලීමක් ආවා හිතවතෙකු මාර්ගයෙන්. ඒ, ඒ දවස්වල තිබුණු හෙලදිව කියන පත්තරේට අපේ කාලේ විස්ස විජ්ජාලෙට අදාල එක්තරා සුවිශේෂී මාතෘකාවක් ගැන ලිපියක් ලියන්න කියලා.

ඔය හෙලදිව පත්තරේ කියන්නේ එක්තරා කූප්‍රකට දේශපාලන කණ්ඩායමකට අයිති පත්තරයක් නේ. උන් ගේ වැඩ පටන් ගත්තු දවසෙම ඉඳලා මට ඇල්ලුවේ නෑ. පත්තරේ නම් හොඳ විශේෂාංග සහ අතිරේක දෙක තුනක් ගියා කියලා මතකයි.

ඒ දේශපාලන හේතුව නිසාම.මං කැමති වුනේ නෑ එහෙම එකක මගේ නමින් ලිපියක් යනවාට.

"හෙලදිවට ලිපියක් දාලා මට ලේබල් ගහගන්න මං කැමති නෑ!" මං මගෙන් මේ ඉල්ලීම කරපු හිතවතා ට කිව්වා "උන් ගේ දේශපාලනය මට අල්ලන්නේ නෑ!".

මගේ හිතවතාත් ඒ පත්තරේට කෙසේ වෙතත් දිර්ඝ කාලයක ඉඳලා විවිධ පුවත්පත්වලට ලිපි ලියපු, වෙනත් වෘත්තියක නියැලී සිටින කෙනෙක්.

පොර මට කිව්වේ මෙච්චරයි.

"ඉතිං, ලක්බිම, දිවයින කියලා මොකක්ද වෙනස? ඒවාත් රන් වෙන්නේ ඒ ඒ මුදලාලිලා ගේ දේශපාලනය අනුව තමයි. තමන් ලියන තමන් ගේ අදහස ඒ විදියට පළවෙනවා නම් අයිතිකාරයා ගේ දේශපාලනය මොකක් වුණාම මොකද?"

මගේ හිතවතා කිව්ව කතාවේ ඇත්තක් නැත්තෙම නෑ. ඒ මොනවා වුණත් මං ඔය කියන ලිපිය ලිව්වේ නෑ කවදාකවත්. කොහොමටත් ටික දවසකින්ම හෙලදිව සෙට්ටපෝච්චි වෙලා ගියා.

එදා ඒ හිතවතා කියපු කරුණු අනුව ලැබුණු අවබෝධය නිසා තමයි මං නලින් ගේ කමෙන්ටුවට ප්‍රතිචාර දක්වපු ඇනෝට මෙහෙම කිව්වේ.

   දිණමිණ පත්තරේ ලියවෙන්නේ එහි අයිතිකරුවන්වන ජහමනයාගේ බහුතර කැමැත්ත ඇති දේ ය.
   දිවයින පත්තරේ ලියවෙන්නේ එහි අයිතිකරුවන් ගේ කැමැත්ත ඇති දේ ය.
   ලක්බිම පත්තරේ ලියවෙන්නේ එහි අයිතිකරුවන් ගේ කැමැත්ත ඇති දේ ය.
   ලංකාදීප පත්තරේ ලියවෙන්නේ එහි අයිතිකරුවන් ගේ කැමැත්ත ඇති දේ ය.
   කොටින්ම
   රාවය පත්තරේ ලියවෙන්නේ ද එහි අයිතිකරුවන් ගේ කැමැත්ත ඇති දේ ය.
   ඒ තියා කතන්දර බ්ලොගේ ලියවෙන්නේ ද එහි අයිතිකාරයා ගේ කැමැත්ත ඇති දේ ය.
   එකම වෙනස නම්:
   මේ බ්ලොගයේ අයිතිකරුවා ගේ අදහස්වලට ප්‍රතිවිරුද්ධ පාඨක අදහස් ද මෙහි පල වීමයි.

-කතන්දරකාරයා


(image: http://kentcrockett.blogspot.com.au/2013_03_01_archive.html)