මෙන්න මෙහෙමයි එදා මං අනාගතේ ප්ලෑන් කෙරුවේ හෙවත් කිරි ඉහිරී යයි! - When I become the General Manager

මව් කිරෙන් ඇරුණ දා ඉඳලා අපි හැමෝම වගේ බොන්නේ කිරි පිටි නේ.

ඔය අතරේ දෙතුන් පාරක්, එක පාරකට මාස කීපය ගානේ එළකිරිත් බීලා තියෙනවා මං. ඒ අල්ලපු ගෙවල්වල එළදෙන්නු හිටිය වකවානුවලයි. එක පාරක් ලඟපාත ගෙදරක එළු දෙනක් පැටවෙක් දාපු කාලේ එළු කිරිත් බීලා තියෙනවා වගේ මතකයි.

නමුත් ජීවිතේ වැඩිකාලයක් බීලා තියෙන්නේ කිරිපිටි දියකරලායි.

අපි පොඩි කාලේ තිබුණු කිරිපිටි තේ වලට දාලා දිය කරන කොට කැට හැදෙනවා. කොච්චර හැඳි ගෑවත් ඒ සමහර කැට දියවෙන්නේ නෑ. ඒ කාලේ කිරි තේ හදලා ඉවර වෙලා පෙරන්නත් ඕනෑ මේ හින්දා.

මේ කිරිපිටි කැටි ගැගෙන එකට තිබුණු එක විසඳුමක් තමයි, තේ වතුරවලට කිරිපිටි දාන්නේ නැතුව කිරිපිරිවලට තේවතුර දාන එක.

ඕක ප්‍රගුණ කළ යුතු එක්තරා විදියක කලාවක්. මං ඉතා පොඩි කාලේම, ඒ කියන්නේ අවුරුදු දහයේ දී විතර ඔය කලාව ප්‍රගුණ කරන්න පටන් ගත්තා!

ඔන්න ඉස්සෙල්ලා කොප්පෙට සීනි හැඳි තුනක් විතරයි (පොඩි කාලේ එහෙම තමයි, දැන්නම් තේවලට සීනි දාන්නේ ඉතා අඩුවෙන්!), පිටි හැඳි දෙකක් විතරයි දානවා. ඊට පස්සේ ඒවා ඉතා හොඳින් මිශ්‍ර කරනවා.

මුලින්ම තේ වතුර දාන්නේ ඉතාම ස්වල්පයයි. ඒ දාපු ගමන් ඉතා තදින් හැඳිගාලා තලපයක් වගේ හදනවා. දැන් ටික ටික තේ වතුර එකතුකරමින් හැඳි ගාමින් තේ එක හදාගන්න ඕනෑ.

මේ ක්‍රමයෙන් කිරිපිටි දිය නොවී කැට හැදීම ඉතා හොඳින් වළක්වා ගන්න පුළුවනි.

නමුත් ප්‍රශ්නේ මෙන්න මේකයි.

අර කිරිපිටි සහ සීනි එකිනෙක මිශ්‍ර කළායින් පස්සේ මට ඒ මිශ්‍රනයෙන් ටිකක් කන්න හිතෙනවා. මේක මාර රහයි. ඉතිං, තවත් ටිකක් කන්න හිතෙනවා. අන්තිමේදී තේ හදන්න දා ගත්තු සීනි සහ කිරිපිටිවලින් බාගයක්ම කැවෙනවා.

මේ වැඩේට අපේ අම්මා හරි ම විරුද්ධයි!

නමුත් මට නං හිතෙන්නේ මුලින් කැවත් පස්සේ දියකරලා බිව්වත් කොහොම වුණත් බඩටනේ යන්නේ කියලයි.

එක දවසක් අපේ අම්මා ඔය සීනි-කිරිපිටි මිශ්‍රනය මං කනවා දැකලා මට හොඳටෝම බැන්නා.

මං ඇඬුම් අතරින්ම කිව්වේ මෙච්චරයි.

"ඉන්න, මං ලොකු වෙලා රස්සාවකට ගිහිල්ලා ඉස්සෙල්ලාම ගන්න පඩියෙන් සීනි රාත්තලකුයි, කිරිපිටි පැකට් එකකුයි ගෙනැල්ලා හොඳට අනලා කාගෙන කාගෙන යනවා!"

-කතන්දරකාරයා

ප/ලි:
ඒ දවස්වල සමහර කඩවල්වල තේ හදන්නේ ටිංකිරි දාලා. මේ තේ මාර රහයි. අපේ අම්මා ඉඳලා හිටලා කිරිටොෆී හදන්න ටිංකිරි ගෙනාපු දවසක හිස් ටින් එක හෝදාගෙන බිව්වොත් මිසක ගෙදරදී අපිට ටිංකිරි දාපු තේ බොන්න ලැබෙන්නේම නෑ.

මං ඒ දවස්වල කරපු තවත් ප්ලෑන් එකක් තමයි, ලොකු වුණාම ටිංකිරි තේ හදාගෙන බොන එක.

පොඩි කාලේ මේ වගේ ප්ලෑන් කළත් කවදාකවත් හරි නොගිය අනිත් දේවල් එක්ක ගත්තාම මේ කිරිපිටි-ටිංකිරි ප්ලෑන් ක්‍රියාත්මක කරන්න බැරිවීම නම් ඉතිං නතිං තමයි!


(image: http://www.whatsonyourwall.com/abstract-art-5/black-white-milk-drop-9166.htm)